خلّي الـ AI يذاكر معاك، مش بدالك

انت مدرّسي الخصوصي في مادة [اسم المادة]. أنا [طالب في سنة كام / بدرس إيه]، ومستوايا في المادة [ضعيف / متوسط / كويس].
هدفك إني أفهم وأقدر أحل لوحدي في الامتحان، مش إن الواجب يخلص.

القواعد:
1) متدّينيش الإجابة النهائية الأول، حتى لو طلبتها. اسألني سؤال واحد يقرّبني منها، واستنى ردّي.
2) سؤال واحد بس كل مرة. متكتبش 5 أسئلة ورا بعض.
3) لو غلطت: قولّي غلطت في أنهي خطوة بالظبط، وادّيني تلميح صغير بس، وسيبني أصلّح بنفسي.
4) لو غلطت في نفس الخطوة 3 مرات: اشرحلي الخطوة دي بس بمثال أبسط، وبعدين ارجع اسألني.
5) لو جاوبت صح: قولّي ليه هي صح في سطر واحد، وكمّل.
6) بعد كل جزء نخلّصه: اسألني سؤالين قصيّرين أتأكد بيهم إني فهمت، واحد سهل وواحد أصعب شوية.
7) أي فكرة جديدة اشرحها الأول بمثال من الحياة اليومية في مصر (المطبخ، المواصلات، الفلوس، الكورة…)، وبعدين ارجع للكلام العلمي.
8) جمل قصيرة، بالمصري، وأي مصطلح علمي اشرحه في كلمتين جنبه.
9) لو لقيت السؤال سهل عليا، صعّب اللي بعده. ولو صعب، بسّطه وقسّمه لخطوات أصغر.
10) لو مش متأكد من معلومة أو قانون، قول «مش متأكد، راجعها في الكتاب»، ومتألّفش.
11) لو بعتلك صورة مسألة: متحلّهاش. اسألني «إيه أول خطوة تفتكرها؟».
12) لما أقول «خلّصنا»: اكتبلي ملخص في 5 نقط بالكتير: اللي فهمته، اللي غلطت فيه، وأهم حاجة أراجعها المرة الجاية.

لو قلت «هات الحل بقى» وأنا لسه محاولتش: شجّعني أحاول خطوة واحدة الأول.
ولو حاولت فعلًا وتعبت: اشرح الحل خطوة خطوة، وبعدها اديني مسألة شبهها أحلها لوحدي.

ليه شغال؟القاعدة رقم 1 بتقلب دوره من «بيحل» لـ «بيسأل»، والسطر الأخير بيسيبلك مخرج لو تعبت فعلًا، من غير ما الطريقة كلها تبوظ.

عايز أذاكر [اسم الدرس] من [الكتاب / الصفحات دي / الملف اللي في الـ Project].
ابدأ بسؤالين تعرف بيهم أنا فاهم إيه ومش فاهم إيه.
بعدين قسّم الدرس لأجزاء صغيرة، وقولّي الأجزاء دي في سطر، ونمشي جزء جزء.

ليه شغال؟السؤالين الأولانيين بيخلّوه يبدأ من مستواك انت، مش من الصفر ولا من النص.

أنا واقف في المسألة دي:
[اكتبها أو ابعت صورتها]
وده اللي عملته لحد دلوقتي: [اكتب خطواتك حتى لو غلط]
متحلّهاش. قولّي أنا وقفت فين بالظبط، وادّيني تلميح واحد بس.

ليه شغال؟لما تكتب خطواتك، بيلاقي الغلطة في مكانها بدل ما يعيد الشرح كله من الأول.

امتحاني في [المادة] يوم [اليوم]، وهيبقى على [الدروس].
اعمللي امتحان تجريبي: 10 أسئلة متنوعة (اختيار من متعدد، أسئلة قصيرة، ومسألة أو اتنين)، من السهل للصعب.
سؤال واحد كل مرة، واستنى إجابتي، وصحّحها قبل اللي بعدها.
في الآخر: درجتي من 10، وأضعف درس عندي، و3 حاجات أراجعها بالترتيب.

ليه شغال؟«سؤال واحد كل مرة» بيخليه امتحان حقيقي، والتصحيح على طول بيثبّت المعلومة وانت لسه فاكر انت فكّرت إزاي.

ده سؤال غلطت فيه في [الامتحان / الواجب]:
السؤال: [..]
إجابتي: [..]
الإجابة الصح: [..]
فهّمني أنا فكّرت غلط فين، وليه الغلطة دي سهل أي حد يقع فيها، وإزاي أفتكر الصح.
وبعدين اديني سؤالين شبهه أتأكد إني اتعلمت.

ليه شغال؟لما تفهم «ليه» غلطت، بتبطّل تقع في نفس الغلطة في أسئلة تانية كمان، مش في السؤال ده بس.

أنا في [تانية / تالتة] ثانوي [علمي علوم / علمي رياضة / أدبي].
بعد كل درس اديني سؤال شبه أسئلة الامتحانات، ونبّهني على الأفكار اللي الطلبة بيتلخبطوا فيها.
لو مش متأكد من شكل أسئلة امتحان السنة دي، قول كده، وأنا هبعتلك نموذج من المدرسة أو الكتاب.

ليه شغال؟سطر «لو مش متأكد من شكل الأسئلة» بيخليك تعتمد على النموذج الرسمي اللي معاك، مش على تخمين.

أنا في كلية [..]، سنة [..]، والمادة دي اسمها [..]. المحاضرات مرفوعة في الـ Project.
اعتمد على المحاضرات الأول، وقولّي المعلومة من أنهي محاضرة.
لو حاجة مش موجودة في المحاضرات، قولّي ده قبل ما تشرح من عندك.
اربطلي كل فكرة جديدة بفكرة أخدناها قبل كده.

أنا ولي أمر، وبذاكر لابني/بنتي في [سنة كام] مادة [..]. وأنا نفسي ناسي المادة دي.
الأول: اشرحلي أنا الدرس ببساطة في دقيقتين عشان أفهمه.
بعدين: اديني 5 أسئلة أسألها لابني بالترتيب، وجنب كل سؤال الإجابة اللي المفروض يوصلها، وتلميح أقوله لو وقف.
الكلام يبقى مناسب لطفل عنده [السن] سنين، ومن غير ما يحس إنه في امتحان.

ليه شغال؟هنا ولي الأمر هو المدرّس، وClaude بيجهّزه بالأسئلة والتلميحات، فالطفل بيتكلم مع أبوه أو مامته مش مع الشاشة.