هنعمل بوت بسيط بيرد على الأسئلة اللي بتتكرر كل يوم: «بكام؟»، «مواعيدكم إيه؟»، «فين مكانكم؟». انت بتكتب الأسئلة والردود بالمصري، وClaude Code بيعمل الباقي.
قبل ما تبدأ
- Claude Code متسطّب ومتسجّل (لو لسه، شوف ملف «Claude Code للمبتدئين»).
- حساب Telegram على موبايلك.
- ليستة بأكتر 5 أسئلة بيسألوهالك وردودها.
اعمل البوت وخد المفتاح
- افتح Telegram ودوّر على BotFather. اختار اللي جنبه العلامة الزرقا.
- ابعتله: /newbot
- اكتب اسم البوت اللي الناس هتشوفه، مثلًا: حلويات منى.
- اكتب username لازم يخلص بـ bot، مثلًا: mona_sweets_bot. الاسم ده مبيتغيّرش بعد كده، فاختاره بهدوء.
- هيبعتلك «مفتاح» طويل اسمه token. انسخه وخليه معاك.
هتشوفBotFather هيبعتلك رسالة فيها لينك البوت (t.me/…) والمفتاح.
نصيحةالمفتاح ده هو اللي بيشغّل البوت، فخليه معاك انت بس. لو حسيت إن حد شافه، ابعت /token لـ BotFather وهو يديك مفتاح جديد.
اطلب البوت من Claude Code
اعمل فولدر جديد فاضي اسمه my-bot، افتح Claude Code جوّاه، واضغط Shift+Tab لحد ما يظهر Plan mode. بعدين الصق:
أنا مش مبرمج. عايز بوت Telegram بسيط بلغة Python لمحل [اسم المحل] بيعمل [بيبيع إيه]. البوت يرد على الأسئلة دي (ولو حد كتبها بطريقة قريبة يفهمها برضو): - [السؤال 1] ← [الرد] - [السؤال 2] ← [الرد] - [السؤال 3] ← [الرد] - [السؤال 4] ← [الرد] - [السؤال 5] ← [الرد] لما حد يبعت /start: رسالة ترحيب قصيرة فيها الأسئلة اللي يقدر يسألها كزراير. لو حد سأل حاجة مش في الليستة: «سؤالك وصل، وهنرد عليك في أقرب وقت» وتحفظ السؤال في ملف questions.txt. حط المفتاح في ملف .env لوحده (أنا هحطه بإيدي)، واعمل .gitignore فيه .env. قبل ما تبدأ: قولّي خطتك ببساطة، واسألني لو محتاج أي حاجة. وفي الآخر: قولّي خطوة خطوة أشغّل البوت إزاي.
ليه شغال؟الأسئلة كزراير بتسهّل على الناس، وملف questions.txt بيجمعلك الأسئلة الجديدة عشان تزوّدها بعدين.
هتشوفClaude Code هيعرض خطته (ملفات قليلة: الكود، .env، requirements). وافق، وهو هيكتب الملفات قدامك.
شغّله
- افتح ملف .env والصق المفتاح بعد العلامة =
- شغّل الأمر اللي Claude Code قالك عليه (غالبًا بيسطّب حاجة صغيرة وبعدين يشغّل البوت). لو مش عارف، قوله: «شغّله انت».
- افتح لينك البوت من موبايلك وابعتله /start.
هتشوفهتلاقي رسالة الترحيب والزراير. دوس على سؤال وشوف الرد.
الأسئلة: - بكام التورتة؟ ← تورتة 1 كيلو بـ 450 جنيه، و2 كيلو بـ 850. - بتوصّلوا؟ ← أيوه، في مدينة نصر ومصر الجديدة، التوصيل 40 جنيه. - المواعيد؟ ← من 10 الصبح لـ 11 بالليل.
حد كتب «التورته بكام» ← البوت: «تورتة 1 كيلو بـ 450 جنيه، و2 كيلو بـ 850 🎂» حد كتب «عندكو كنافة؟» ← البوت: «سؤالك وصل، وهنرد عليك في أقرب وقت» (والسؤال يتسجّل في questions.txt).
لو حاجة مش مظبوطة
لو حاجة مش مظبوطة
البوت مش بيرد خالص
اتأكد إن الأمر لسه شغال في الشاشة، وإن المفتاح في .env مظبوط من غير مسافات. أو انسخ أي رسالة حمرا والصقها لـ Claude Code.
ظهرلي error أحمر
انسخه كله والصقه لـ Claude Code وقوله: «ظهرلي ده، صلّحه». غالبًا بيتحل من أول مرة.
البوت وقف لما قفلت اللابتوب
طبيعي. البوت شغال طول ما جهازك شغال. التشغيل 24 ساعة خطوة جاية (تحت).
عايز أغيّر رد
قول لـ Claude Code: «غيّر رد سؤال التوصيل لـ [الرد الجديد]».
username مرفوض
جرّب اسم تاني، ولازم يخلص بـ bot.
كلمات هتقابلك
- Token (مفتاح)
- كلمة سر البوت. أي حد معاه يقدر يتحكم في البوت.
- .env
- ملف صغير بنحط فيه الأسرار بعيد عن باقي الكود.
- Python
- اللغة اللي الكود مكتوب بيها. انت مش محتاج تتعلمها دلوقتي.
عايز البوت شغال 24 ساعة؟ قول لـ Claude Code: «إزاي أرفع البوت ده على Railway عشان يفضل شغال وجهازي مقفول؟ قولّي الخطوات ببساطة».
المصادر: Telegram: إنشاء بوت مع BotFather