أكتر حاجة بتفضح الكلام المكتوب بالـ AI إنه مش شبه صاحبه: فصحى تقيلة، وجمل محفوظة زي «في عالم…». الحل إنك توري Claude نماذج من كتابتك انت، وهو يمشي عليها.
قبل ما تبدأ
- حساب على claude.ai.
- 3 نماذج من كتابتك (هنختارهم سوا في الخطوة الجاية).
- حاجة عايز تكتبها: بوست، رسالة، إيميل.
اختار 3 نماذج كويسة
- انت اللي كاتبها بنفسك، من غير AI.
- نفس النوع اللي عايزه يكتبه: عايز بوستات؟ ابعت بوستات. عايز إيميلات شغل؟ ابعت إيميلات.
- مواضيعهم مختلفة شوية، عشان ياخد الأسلوب مش الموضوع.
- كل نموذج من فقرة لنص صفحة. السطر الواحد قليل.
- بلغتك الحقيقية: لو بتكتب مصري، ابعت مصري.
- شيل منها أرقام التليفونات وأسماء الناس قبل ما ترفعها.
دي 3 نماذج من كتابتي: [نموذج 1] --- [نموذج 2] --- [نموذج 3] اكتبلي «كارت أسلوبي» في 8 نقط قصيرة: طول جملي، الكلمات اللي بكررها، إزاي ببدأ وإزاي بخلّص، مصري ولا فصحى، بستخدم إيموجي ولا لأ، بضحك ولا جاد، وأي حاجة مميزة فيا. متمدحش، اوصف بس.
ليه شغال؟الكارت ده بيوريك Claude فهم إيه، وتقدر تستخدمه في الطريقتين اللي تحت.
هتشوفهيطلعلك 8 نقط. لو فيه نقطة مش شبهك، صحّحها: «لأ، أنا مش بستخدم إيموجي خالص».
الطريقة الأولى: Styles
Claude فيه أساليب جاهزة: Normal (العادي)، Concise (مختصر)، Formal (رسمي)، Explanatory (بيشرح بالتفصيل). وتقدر تعمل أسلوب خاص بيك:
- في صندوق الكتابة، افتح قايمة الأدوات اللي تحت على الشمال، واختار Use style.
- دوس Create & edit styles، وبعدين Create custom style.
- اختار Add Writing Example، والصق نماذجك الـ 3 أو ارفعهم.
- دوس Create style. (أو اختار Describe style instead والصق «كارت أسلوبي».)
- بعد كده، قبل ما تكتب، اختار أسلوبك من Use style.
نصيحةلو Styles مش ظاهرة عندك، استخدم الطريقة التانية. بتوصل لنفس النتيجة.
الطريقة التانية: Project بأسلوبك
- افتح Projects واعمل مشروع جديد اسمه «بكتب زيي».
- ارفع نماذجك كملفات في ملفات المشروع (Project knowledge)، أو الصقهم كنص.
- في تعليمات المشروع (Project instructions) الصق التعليمات اللي تحت.
- أي حاجة عايز تكتبها، افتح لها شات جوّه المشروع ده.
انت بتكتب بأسلوبي أنا. نماذج كتابتي موجودة في ملفات المشروع. قبل أي كتابة: اقرا النماذج، وامشي على طول جملي وكلماتي وطريقتي في البداية والنهاية. وانت بتكتب: - مصري زي النماذج، مش فصحى. - جمل قصيرة. فكرة واحدة في كل سطر. - متبدأش بـ «في عالم…» أو «هل تساءلت يومًا…». - متستخدمش كلمات زي «رحلة»، «لا يُصدَّق»، «في الختام»، «لا شك أن». - الإيموجي على قد اللي في نماذجي، مش أكتر. - خد الأسلوب مش الجمل: متنسخش جمل من النماذج. - لو محتاج معلومة عني أو عن شغلي، اسألني. متخترعش قصص أو أرقام على لساني.
ليه شغال؟الممنوعات المحددة بتشيل أكتر علامات الـ AI انتشارًا، و«خد الأسلوب مش الجمل» بيمنعه يكرر كلامك القديم.
مراجعة «يبان إنسان»
أي كلام طلع شبه روبوت، حتى لو انت اللي كاتبه، الصقه هنا:
راجع الكلام ده وخليه يبان إن إنسان مصري كتبه: [الصق الكلام] 1) شيل أي جملة محفوظة أو مالهاش لازمة. 2) قسّم أي جملة طويلة لجملتين. 3) بدّل الكلمات الفصحى التقيلة بكلام عادي (بدل «نقدّم لكم» قول «عندنا»). 4) شيل التكرار والإيموجي الزيادة، والنقط اللي بتبدأ كلها بنفس الشكل. 5) خلّي فيه تفصيلة حقيقية واحدة على الأقل (مكان، موقف، اسم منتج). لو مفيش، اسألني عليها. 6) أي جملة مفيش مصري هيقولها كده بصوت عالي، غيّرها. اديني النسخة النهائية بس، وتحتها سطر بأهم 3 حاجات غيّرتها.
ليه شغال؟«التفصيلة الحقيقية» هي أكتر حاجة بتخلي الكلام يبان بتاعك، والـ AI ميعرفهاش غير منك.
مثال: قبل وبعد
قبل (من غير أسلوب): «في عالم الموضة المتغيّر باستمرار، يسعدنا أن نقدّم لكم تشكيلتنا الحصرية الجديدة من الملابس الشتوية التي تجمع بين الأناقة والراحة ✨🧥🔥 لا تفوّتوا الفرصة!»
بعد (بأسلوب صاحب المحل، من نماذج بوستاته): «الشتا جه بدري السنة دي 😅 نزّلنا البلوفرات الصوف، 6 ألوان. الخامة تقيلة ومبتنسّلش، وجرّبناها غسيل بنفسنا. عدّوا علينا في سيدي جابر، أو ابعتوا المقاس على الواتساب.»
نفس الطريقة لـ 3 حالات
- طالب: ابعت نماذج من رسايلك للدكاترة أو تعليقاتك، واكتب بيها إيميلات وطلبات بأسلوبك المحترم.
- موظف: اعمل Style لإيميلات الشغل من 3 إيميلات بعتّها قبل كده، وواحد تاني لرسايل الفريق.
- صاحب مشروع: Style للبوستات، وواحد لردود الواتساب على الزباين. كل نوع ليه نماذجه.
لو حاجة مش مظبوطة
لو حاجة مش مظبوطة
لسه بيكتب فصحى
قوله: «اكتب مصري زي نماذجي بالظبط»، وزوّد نموذج رابع مصري واضح.
بيكرر نفس جمل النماذج
قوله: «خد الأسلوب بس، ومتنسخش ولا جملة من النماذج».
نسي الأسلوب في نص الشات
قوله: «ارجع لأسلوب النماذج»، أو افتح شات جديد واختار الـ Style تاني.
لسه شكله روبوت
عدّيه على مراجعة «يبان إنسان»، وغالبًا نماذجك محتاجة تبقى أطول أو أقرب لنوع الكلام اللي بتكتبه.
مش لاقي Use style
استخدم طريقة الـ Project، بتدّي نفس النتيجة.
كلمات هتقابلك
- Style
- أسلوب كتابة محفوظ، بتختاره قبل ما تكتب.
- Writing Example
- نموذج من كتابتك بيتعلم منه.
- Project
- مساحة في Claude ليها تعليماتها وملفاتها.
اختبر الأسلوب: «قارن الكلام ده بنماذجي، واديله درجة من 10 في إنه شبهي، وقولّي إيه أكتر حاجة فاضحة إنه مكتوب بالـ AI».
المصادر: Claude: Styles · Claude: إيه هي الـ Projects