الحد في Claude مش «عدد رسايل». هو زي عداد التاكسي: بيحسب المسافة، مش كام نوبة وقفت. الشات الطويل والملف الضخم بيصرفوا منه أكتر بكتير من سؤال قصيّر. لما تفهم ده، تقدر تعمل نفس الشغل وانت بتصرف أقل.
الحد بيتحسب إزاي؟
- اللي بيأثر عليه (حسب صفحة الدعم الرسمية): طول المسدج، حجم الملفات، طول الشات، الأدوات زي البحث على النت، الموديل، مستوى المجهود (effort)، والملفات والـ Artifacts اللي Claude بيعملها.
- أهم واحدة: طول الشات. كل مسدج جديدة Claude بيبص معاها على الكلام اللي فات، فالشات اللي طوّل كل مسدج فيه بتتحسب أتقل.
- الحد بيتجدد كل 5 ساعات من أول مسدج بتبعتها، والمعاد بيبقى مكتوب في الرسالة: «5-hour limit reached - resets [الوقت]».
- ممكن تشوف رسالة قبلها: «Approaching session limit»، يعني فاضل شوية.
نصيحةمفيش عدد ثابت للمسدجات في المجاني. العدد بيختلف حسب طلبك وحسب الضغط على Claude ساعتها، فأي حد يقولك رقم معيّن ده تقريب.
شات جديد بملخص (بدل الشات الضخم)
شات لكل موضوع. ولو الشات طوّل ومحتاج تكمّل، متكمّلش فيه: خد منه ملخص وابدأ شات جديد.
لخّصلي الشات ده في نقط عشان أكمّل في شات جديد: 1) الهدف 2) اللي اتفقنا عليه والقرارات 3) أي أسماء أو أرقام مهمة زي ما هي بالظبط 4) اللي لسه ناقص خلّي الملخص قصيّر، ومتزوّدش أي حاجة مش في الشات.
ليه شغال؟الأجزاء الأربعة بتحفظ اللي محتاجه بس، و«زي ما هي بالظبط» بتمنعه يقرّب أرقام أو يبدّل أسماء.
- انسخ الملخص.
- افتح New chat.
- الصق الملخص واكتب تحته: «كمّل من هنا».
هتشوفنفس المعلومات في شات جديد خفيف، وكل مسدج بعد كده بتتحسب أقل.
- إمتى تبدأ شات جديد؟ لما الموضوع يتبدّل · لما يبدأ ينسى حاجات قلتها في الأول · لما تشوف «Your message will exceed the length limit for this chat».
- في المجاني الشات الطويل مش بيتلخّص لوحده (المدفوع بيعمل كده)، فالملخص ده هو الحل.
عدّل مسدجك بدل ما تبعت تصليح
لو Claude فهمك غلط وبعتله «لا مش ده قصدي»، الإجابة الغلط بتفضل في الشات وبتتحسب مع كل مسدج بعدها.
- حط الماوس على مسدجك.
- اضغط أيقونة القلم (Edit).
- عدّل الطلب نفسه أو زوّد التفصيلة اللي نسيتها، وابعته تاني.
هتشوفالإجابة القديمة بتتشال، وإجابة جديدة مكانها، والشات يفضل نضيف.
كل أسئلتك في مسدج واحدة
بدل 4 مسدجات متقطّعة («عايز بوست» ← «للمحل» ← «عن خصم الجمعة» ← «وخليه قصيّر»)، ابعت كل حاجة مرة واحدة، وكل طلب برقمه.
عندي 3 طلبات، جاوب كل واحد لوحده تحت رقمه: 1) اكتبلي بوست فيسبوك قصيّر لمحل حلويات عن خصم يوم الجمعة: علبة بسبوسة وعلبة كنافة. 2) اقترحلي 3 عناوين للبوست. 3) اكتبلي إجابة في سطرين لزبون بيسأل: «الخصم لحد إمتى؟» (لو المعلومة مش عندك، سيب مكانها [ ]). الإجابات بالمصري، ومتبدأش بمقدمة.
ليه شغال؟الطلبات المترقّمة بتتعمل في نوبة واحدة، و«بالمصري ومتبدأش بمقدمة» بتحدد الشكل من الأول فمش هتعيد الطلب.
الموديل على قد المهمة
- في المجاني فيه Sonnet وHaiku. Opus في Pro بس.
- Haiku للخفيف: «صحّحلي الجملة دي»، جملة للإنجليزي، إجابة قصيّرة.
- Sonnet للعادي: «اكتبلي إيميل للشغل عن إجازة»، بوست، ملخص، ملف، «لخّصلي الملف ده وطلّعلي جدول».
- مش متأكد؟ ابدأ بـ Haiku، ولو الإجابة مش عاجباك بدّل لـ Sonnet.
- جنب اسم الموديل فيه مستوى المجهود (زي Medium). المهمة البسيطة مش محتاجة High.
الملفات: اللي محتاجه بس… والمتكرر في Project
- ملف ضخم بيتحسب وبيفضل في الشات مع كل مسدج. محتاج فصل واحد؟ حط الفصل ده بس.
- ملف بترجعله كل يوم (منيو، جدول شغل)؟ حطّه في Project. حسب صفحة الدعم، محتوى الـ Project بيتحسب أقل لما تستخدمه تاني، بس لو سبته وقت طويل بيتحسب كامل من الأول.
- أي شات جديد جوّا الـ Project بيشوف الملفات لوحده، فمش هتلزقها كل نوبة.
اطلب اللي محتاجه بس
- الـ Artifacts والملفات والبحث على النت بيتحسبوا أتقل من الكلام العادي.
- عايز 3 عناوين؟ اطلبهم كلام في الشات، مش ملف Word. الملف لما هتنزّله أو تبعته فعلًا.
متبحثش على النت، جاوب من اللي عندك: [سؤالك]. في 3 جمل ومثال واحد.
ليه شغال؟لو سؤالك مش محتاج حاجة جديدة من النت، الجملة دي بتوفّر أداة البحث.
وزّع شغلك على اليوم
- الحد بيتجدد كل 5 ساعات: الشغل التقيل (ملفات، Artifacts) في وقت، والأسئلة الخفيفة في وقت تاني.
- لو خلص فعلًا: المعاد مكتوب قدامك. جهّز طلبك الجاي في نوتة بكل تفاصيله، وابعته مسدج واحدة كاملة أول ما يتجدد.
شات فيه أكتر من 40 مسدج عن تجهيز عروض الجمعة لمحل حلويات، وبدأ ينسى الأسعار اللي اتفقنا عليها.
1) الهدف: بوستات وعروض لكل جمعة في الشهر. 2) اتفقنا: خصم على البسبوسة والكنافة بس · البوست 4 جمل وإيموجي واحد · آخر جملة رقم الواتساب. 3) أرقام مهمة: علبة البسبوسة [السعر] · الكنافة [السعر] (زي ما اتكتبوا في الشات). 4) لسه ناقص: صورة المنتجات · معاد آخر طلب يوم الخميس. (الملخص ده مثال لشكل النتيجة.)
نصيحةكلمة بأمانة: Pro الاستخدام فيه أعلى، بس هو كمان ليه حد، فالعادات دي مفيدة لأي حد. ومفيش حاجة ببلاش تفتح الحد: أي حد بيبيع «Pro ببلاش» أو أكونت متقسّم على ناس، خليك بعيد عنه.
لو حاجة مش مظبوطة
الحد خلص في نص شغل مهم
خد الملخص قبل ما يخلص لو قدرت، ولما يتجدد افتح شات جديد بالملخص.
«Your message will exceed the length limit for this chat»
الشات طوّل أوي: طلب الملخص ← شات جديد. أو قسّم الملف لأجزاء أصغر.
بيخلص بسرعة حتى في الأسئلة البسيطة
شوف: انت في شات طويل؟ فيه ملف ضخم مرفوع فوق؟ جرّب شات جديد وHaiku.
نسيت أعدّل وبعت «مش ده قصدي»
عادي. المرة الجاية استخدم القلم، أو خد ملخص لو الشات اتلخبط.
مش لاقي أيقونة القلم
حط الماوس على مسدجك انت (مش على إجابة Claude)، الأيقونة بتظهر تحتها.
- الحد (usage limit)
- قد إيه تقدر تستخدم Claude في وقت معيّن
- شباك الـ 5 ساعات
- الحد بيتجدد بعد 5 ساعات من أول مسدج
- Haiku / Sonnet
- موديلين في المجاني: الأخف والعادي
- effort
- قد إيه Claude بيدّي المهمة مجهود
- Project
- مكان لموضوع واحد فيه تعليمات وملفات وشاتات
اعمل Project لأكتر حاجة بتعملها كل أسبوع، وحط فيه الملفات اللي بتلزقها كل نوبة. ده لوحده بيوفّر من الحد كل يوم.
المصادر: Claude: Usage limit best practices · Claude: Troubleshoot error messages · Claude: Pricing (Free / Pro)