إحنا متعودين على جوجل: كلمتين وEnter. ده مناسب لجوجل لأنه بيدوّر على صفحات موجودة. الـ AI مختلف: بيكتبلك رد جديد مخصوص ليك، فكل ما تحكيله أكتر، الرد بيطلع على مقاسك.
قبل ما تبدأ
- أي أداة AI مفتوحة قدامك.
- حاجة حقيقية محتاجها النهارده (رسالة، خطة، شرح).
الفرق في مثال واحد
- زي جوجل: «خطة مذاكرة» ← نصايح عامة ممكن تتقال لأي حد.
- زي ما بتكلّم حد فاهم: «أنا في تالتة ثانوي علمي علوم، فاضلي 3 شهور، وضعيف في الفيزيا…» ← خطة ليك انت.
الـ 5 حاجات اللي تحكيها
- انت مين: «أنا طالب / صاحب محل / بشتغل محاسب».
- عايز إيه: النتيجة اللي محتاجها في الآخر.
- الحكاية: التفاصيل اللي تخص موقفك انت.
- الشروط: الطول، الميزانية، الحاجات اللي مش عايزها.
- الشكل: نقط، جدول، رسالة واتساب، 5 سطور.
نصيحةمش لازم الخمسة في كل مرة. بس كل ما تزوّد واحدة، الرد بيقرّب أكتر من اللي في دماغك.
اتكلّم معاه، متسألش وتمشي
أول رد هو أول مسودة. كمّل الكلام زي ما بتكمّل مع صاحبك:
- «اختصره لنص».
- «خليه أبسط، كأني بشرحه لأخويا الصغير».
- «ادّيني 3 اختيارات مختلفين».
- «إيه أضعف حتة في الكلام ده؟ صلّحها».
خليه يسألك
عايز [النتيجة اللي محتاجها]. قبل ما تبدأ، اسألني الأسئلة اللي محتاجها عشان تطلّع حاجة على مقاسي. سؤال واحد كل مرة، وبحد أقصى 5 أسئلة. بعدها اكتب النتيجة.
ليه شغال؟انت مش لازم تعرف كل التفاصيل المهمة. هو بيعرف، فخليه هو يطلعها منك.
ادّيله مثال
لو عندك شكل معين في دماغك، وريهوله: «اكتب زي الرسالة دي: [الصق]». مثال واحد بيوصّل أكتر من 10 سطور وصف.
5 أمثلة قبل وبعد
قبل: «خطة مذاكرة» بعد: «أنا في تانية تجارة في المنصورة. عندي امتحانات بعد 4 أسابيع في 5 مواد. المحاسبة والإحصاء أصعب حاجة عليّا. بقدر أذاكر 4 ساعات في اليوم، والجمعة إجازة. اعمللي خطة في جدول يوم بيوم، وسيب يومين في الآخر للمراجعة.»
قبل: نصايح عامة زي «نام كويس واعمل جدول». بعد: جدول 4 أسابيع، المحاسبة والإحصاء واخدين وقت أكتر، الجمعة فاضية، وآخر يومين مراجعة.
قبل: «بوست لمحل فول وطعمية» بعد: «عندي محل فول وطعمية في شبرا. عامل عرض فطار: 5 سندوتشات بـ 50 جنيه من 7 لـ 11 الصبح. الزباين أغلبهم طلبة وموظفين رايحين شغلهم. اكتبلي 3 بوستات فيسبوك قصيرة بالمصري، كل واحد أقل من 40 كلمة، بأسلوب خفيف، ومن غير مبالغة.»
قبل: بوست عام عن «أطعم فول في مصر». بعد: 3 بوستات فيها العرض والسعر والمواعيد، واحد منهم: «رايح الشغل ومتأخر؟ 5 سندوتشات بـ 50 جنيه، من 7 لـ 11 الصبح 🥙».
قبل: «إيميل طلب أجازة» بعد: «أنا محاسب في شركة، عايز أطلب أجازة 3 أيام من 12 لـ 14 نوفمبر عشان فرح أخويا. مديري اسمه أ. هشام، والعلاقة رسمية بس كويسة. هخلّص التقرير الشهري قبلها، وزميلي أحمد هيغطّي. اكتب الإيميل بالعربي، 5 سطور بالكتير.»
قبل: قالب عام فيه [الاسم] و[التاريخ] ولازم تملاه كله. بعد: إيميل جاهز للإرسال، فيه التواريخ والسبب وإن التقرير خلصان ومين هيغطّي، ودي أكتر حاجة مدير بيحب يقراها.
قبل: «أماكن في دهب» بعد: «رايحين دهب 4 أصحاب، 3 أيام في نوفمبر، ميزانية الفرد [المبلغ] من غير المواصلات. بنحب البحر والسنوركل، ومش بنحب السهر. اعمللي برنامج يوم بيوم، وقولّي إيه اللي محتاج حجز قبلها. لو مش متأكد من سعر أو ميعاد، قولّي أتأكد منه.»
قبل: ليستة أماكن مشهورة. بعد: برنامج 3 أيام مركّز على البحر، فيه وقت راحة، وليستة «احجز قبلها»، وجنب أي سعر: «اتأكد منه قبل ما تسافر».
قبل: «يعني إيه التضخم» بعد: «اشرحلي التضخم كأني في تالتة إعدادي. استخدم مثال من الحاجات اللي بنشتريها في البيت. 5 سطور بالكتير، وبعدها اسألني سؤال واحد تتأكد بيه إني فهمت.»
قبل: تعريف من كتاب اقتصاد. بعد: «زمان بالـ 100 جنيه كنت بتجيب شنطة خضار مليانة، دلوقتي بتجيب نصها. الفلوس نفسها مقلّتش، بس اللي بتشتريه بيها قلّ. ده التضخم.» وبعدها سؤال صغير يتأكد إنك فهمت.
القالب: ابدأ بيه أي محادثة
أنا [مين انت في سطر]. عايز [النتيجة اللي محتاجها في الآخر]. الحكاية: [التفاصيل اللي تخص موقفك]. الشروط: [الطول، الميزانية، الحاجات اللي مش عايزها]. الشكل: [نقط / جدول / رسالة واتساب / 5 سطور]. اكتب بالمصري البسيط. لو فيه معلومة ناقصة مهمة، اسألني قبل ما تبدأ. ولو مش متأكد من حاجة، قول إنك مش متأكد.
ليه شغال؟الخمس سطور دول بيردّوا على كل الأسئلة اللي الـ AI كان هيخمّنها، فبياخدك على طول للرد المظبوط.
هتشوفأول رد هيبقى قريب جدًا من اللي محتاجه. كمّل بجملة أو اتنين («اختصره»، «خليه أخف») وهتوصل.
لو الرد مش زي ما انت عايز
لو حاجة مش مظبوطة
الرد طويل
قوله: «في 5 سطور بالكتير» أو «نقط بس، من غير مقدمة».
الرد عام ومش ليّا
زوّد: انت مين + تفصيلة من موقفك، أو قوله: «اسألني 3 أسئلة الأول».
بيكتب فصحى رسمية
قوله: «اكتب بالمصري زي ما بنتكلم، زي الجملة دي: [جملة بأسلوبك]». ولو بتستخدم Claude كتير، اعمل Style بأسلوبك.
حط معلومة مش متأكد منها
قوله: «لو مش متأكد قول مش متأكد، وقولّي أتأكد منين». والأرقام والمواعيد راجعها بنفسك.
نسي اللي قلته في الأول
الشات طوّل. اطلب ملخص، وافتح شات جديد بيه.
كلمات هتقابلك
- Prompt (طلب)
- الكلام اللي بتكتبه للـ AI.
- Context (سياق)
- الحكاية والتفاصيل اللي حوالين طلبك.
- Follow-up
- رسالة بتكمّل بيها بعد أول رد.
خد طلب كتبته امبارح بطريقة جوجل، والصقه في الطلب ده: «ده طلب كتبته: [الصق]. اسألني 3 أسئلة تكمّل بيها الناقص، وبعدها اكتبه من جديد بالقالب: مين، عايز إيه، الحكاية، الشروط، الشكل».