الشات العادي بيقولك تعمل إيه، وانت اللي بتعمل. الـ Agent بتدّيله الهدف، وهو يقسّمه خطوات، ويستخدم أدوات، ويرجعلك بالنتيجة. الملف ده بيبسّط الفكرة، ويديك قالب تكتب بيه أي مهمة صح من أول مرة.
الشات بيقولك… والـ Agent بيعمل
- شات: «إزاي أختار لابتوب؟» ← نصايح، وانت اللي تدوّر وتقارن.
- Agent: «هاتلي أحسن 3 لابتوبات للمذاكرة لحد [المبلغ]» ← يدوّر، ويفتح صفحات، ويقارن، ويرجعلك بجدول ولينكات.
- شات: «إزاي ألاقي شغل؟» ← «ادخل على مواقع الوظايف…».
- Agent: «ده الـ CV بتاعي، هاتلي 5 وظايف مناسبة» ← يدوّر ويجيبلك جدول بلينكات.
دماغ · إيدين · ذاكرة · هدف
- الدماغ: الموديل (Claude أو ChatGPT أو Gemini). بيفهم المهمة ويحدد يعمل إيه الأول. هو نفس اللي بتكلّمه في الشات.
- الإيدين: الأدوات. بحث على النت، فتح صفحات، قراية وكتابة ملفات، وأحيانًا الإيميل والكالندر. من غيرها بيتكلم بس.
- الذاكرة: فاكر عمل إيه، ولسه فاضل إيه، وفاكر تعليماتك.
- الهدف: إمتى الشغل يبقى خلص. ودي الحاجة اللي انت لازم تكتبها بإيدك.
من جوّا: لفّة بتتعاد
- يفكّر: أعمل إيه دلوقتي؟
- يعمل خطوة بأداة (يدوّر مثلًا).
- يبص على النتيجة: لقى إيه؟ ناقصه إيه؟
- يحدد الخطوة الجاية… ويلف تاني لحد ما يوصل للهدف أو يقف ويسألك.
Anthropic (الشركة اللي عاملة Claude) بتوصف الـ Agents في مقال «Building effective agents» إنهم موديلات بتستخدم أدوات على حسب النتيجة اللي بتشوفها، في لفّة. وعشان كده الهدف الواضح مهم: من غيره اللفّة مش هتعرف تقف فين.
Workflow ولا Agent؟
- Workflow: خطوات ثابتة بتتعمل كل مرة بنفس الشكل. مثال: «كل إيميل فيه فاتورة ← احفظه في فولدر ← ابعتلي إشعار». حتى لو فيه AI في خطوة منهم، لسه Workflow.
- Agent: بتدّيله الهدف، وهو يحدد الخطوات. مفيد لما المهمة مفتوحة ومش واضح هتاخد كام خطوة.
- نصيحة Anthropic: ابدأ بأبسط حل، وزوّد بس لما تحتاج. ساعات سؤال واحد في الشات كفاية.
القالب: أي مهمة لأي Agent
المهمة: [عايز توصل لإيه، في جملة] ليه: [هتستخدم النتيجة في إيه] الحدود: [ميزانية، مدة، مصادر مسموحة، حاجات ممنوعة] الشغل يبقى خلص لما: [شكل النتيجة بالظبط: جدول بأعمدة كذا، أو ليستة فيها كذا] قبل ما تبدأ: اكتبلي خطتك في 3 لـ 5 خطوات واستنى موافقتي، ولو حاجة مش واضحة اسألني. أي معلومة مش متأكد منها اكتب جنبها «مش متأكد»، وحط لينك المصدر جنب كل معلومة.
ليه شغال؟«الشغل يبقى خلص لما…» بتخليه يقف في المكان الصح، و«الخطة الأول» بتخليك تصلّح السكة قبل ما يمشي فيها.
هتشوفأول إجابة هتبقى خطة بس. اقراها، عدّل فيها لو محتاج، وبعدين قوله «تمام، ابدأ».
5 مهام جاهزة (ببلاش)
نصيحةاتأكد إن البحث على النت شغال في Claude قبل ما تبعت أي مهمة منهم.
المهمة: 5 كورسات أونلاين ببلاش أتعلم بيها [المهارة، مثلًا Excel] بالعربي، للمبتدئين. ليه: هبدأ أتعلم الأسبوع ده، ووقتي ساعة في اليوم. الحدود: ببلاش بس، ومحدّثة (لو تقدر تعرف). الشغل يبقى خلص لما: جدول فيه الاسم | الجهة | المدة تقريبًا | فيه شهادة؟ | اللينك، وفي الآخر قولّي أبدأ بأنهي واحد وليه في سطرين. قبل ما تبدأ اكتبلي خطتك واستنى موافقتي. لو معلومة مش لاقيها اكتب «مش مذكور» متألّفهاش.
ليه شغال؟أعمدة محددة + لينك لكل صف = نتيجة تراجعها في دقيقة.
المهمة: أحسن 3 لابتوبات لـ [الاستخدام: مذاكرة / تصميم / شغل مكتب]. ليه: هستخدمه في [المذاكرة / الشغل / التصميم]. الحدود: لحد [المبلغ] جنيه، ومن مواقع بتبيع في مصر. الشغل يبقى خلص لما: جدول فيه الاسم | المواصفات المهمة | السعر وتاريخه | اللينك، وجملة لكل واحد: مناسب لمين. قبل ما تبدأ اكتبلي خطتك واستنى موافقتي. متحطش سعر من دماغك: لو مش لاقي سعر حديث اكتب «اتأكد من الموقع».
ليه شغال؟«السعر وتاريخه» بيخليك تعرف المعلومة قديمة ولا جديدة.
المهمة: 5 وظايف معلنة دلوقتي مناسبة للـ CV ده. ليه: هقدّم عليهم الأسبوع ده. الحدود: في [المدينة] أو أونلاين، ومستوى [مبتدئ / خبرة سنتين]. الشغل يبقى خلص لما: جدول فيه الوظيفة | الشركة | ليه مناسبة ليا | اللينك. ولو مش متأكد إن الإعلان لسه مفتوح، اكتب كده جنبه. قبل ما تبدأ اكتبلي خطتك واستنى موافقتي. [الصق الـ CV]
ليه شغال؟لما الـ Agent يشوف الـ CV، بيدوّر على حاجات شبهك انت، مش أي وظيفة.
نصيحةامسح رقم تليفونك وعنوانك وأي رقم قومي من الـ CV قبل ما تلزقه.
المهمة: خطة مذاكرة أسبوعين لـ [المادة أو المهارة] للمبتدئين. ليه: عندي [امتحان / إنترفيو] يوم [التاريخ]. الحدود: ساعتين في اليوم، ومصادر ببلاش بس (فيديوهات أو مقالات). الشغل يبقى خلص لما: جدول يوم بيوم فيه الموضوع | المصدر بلينكه | مدة تقريبًا. قبل ما تبدأ اكتبلي خطتك واستنى موافقتي.
ليه شغال؟الهدف والميعاد بيخلّوا الخطة واقعية بدل ليستة مصادر ملهاش آخر.
المهمة: مقارنة بين [خدمة 1] و[خدمة 2] و[خدمة 3] (مثلًا: باقات إنترنت أو تطبيقات). ليه: هختار واحدة عشان [هستخدمها في إيه]. الحدود: المعلومات من المواقع الرسمية بس، ومن آخر 3 شهور. الشغل يبقى خلص لما: جدول فيه الاسم | السعر وتاريخه | أهم ميزة | أهم عيب | اللينك. قبل ما تبدأ اكتبلي خطتك واستنى موافقتي. لو معلومة مش لاقيها اكتب «مش مذكور».
ليه شغال؟«المواقع الرسمية بس» بتقلل المعلومات القديمة والمنقولة غلط.
فين تلاقي Agent دلوقتي؟
- Claude المجاني: بحث على النت، وبيعمل ملفات، وبيشغّل كود، وتقدر توصّله بتطبيقاتك (Connectors) بنفسك.
- ChatGPT المجاني: فيه Deep Research بحدود.
- Gemini المجاني: فيه Deep Research.
- Claude المدفوع (Pro وأعلى): Research، بحث أعمق بمصادر.
- Claude Code (Pro وأعلى): Agent بيشتغل جوّا فولدر على جهازك.
إمتى تستخدمه… وإمتى لأ
- نعم: مقارنة بين حاجات، تجميع معلومات من أماكن كتير، خطة فيها خطوات.
- لأ: سؤال سريع، كلمة عايز تفهمها، جملة عايز تصلّحها. الشات العادي أسهل وأسرع.
نصيحة3 عادات بتخليك انت ماسك الدفّة: اطلب الخطة الأول. خليه يستأذنك قبل أي حاجة مهمة زي إنه يبعت حاجة باسمك أو يدفع. ومتكتبش باسووردات أو بيانات حساسة في الطلب.
المهمة: 5 كورسات أونلاين ببلاش أتعلم بيها Excel بالعربي، للمبتدئين. ليه: هبدأ أتعلم الأسبوع ده، ووقتي ساعة في اليوم. الحدود: ببلاش بس، ومحدّثة (لو تقدر تعرف). الشغل يبقى خلص لما: جدول فيه الاسم | الجهة | المدة تقريبًا | فيه شهادة؟ | اللينك، وفي الآخر قولّي أبدأ بأنهي واحد وليه في سطرين. قبل ما تبدأ اكتبلي خطتك واستنى موافقتي. لو معلومة مش لاقيها اكتب «مش مذكور» متألّفهاش.
أول إجابة: خطة في كام خطوة (يدوّر ← يتأكد إنها ببلاش ← يجمع المعلومات ← يحطها في جدول)، ومستني موافقتك. بعد «تمام، ابدأ»: بيبحث على النت، وبعدين جدول بالأعمدة اللي طلبتها ولينكات، و«مش مذكور» جنب أي معلومة مش لاقيها، وترشيح في سطرين. (افتح اللينكات بنفسك واتأكد قبل ما تبدأ.)
لو حاجة مش مظبوطة
بدأ يشتغل من غير ما يكتب خطة
ابدأ شات جديد وحط جملة «اكتبلي خطتك واستنى موافقتي» في أول الطلب مش في آخره.
مبيدوّرش على النت
اتأكد إن البحث على النت شغال من زرار الأدوات اللي في مربع الكتابة، وقوله صريح: «دوّر على النت».
جاب حاجات ملهاش لازمة
الحدود ناقصة: زوّد المدة والميزانية والمصادر المسموحة، وحدد شكل النتيجة بالأعمدة.
لينك مش شغال أو بيقول كلام تاني
قوله: «اللينك ده مش بيقول كده، دوّر تاني وهات مصدر بيقول المعلومة دي بالظبط».
النتيجة طويلة وملخبطة
ارجع لـ «الشغل يبقى خلص لما…» واكتب الأعمدة بالظبط، أو قوله «حطها في جدول بس».
- Agent
- AI بيعمل المهمة بنفسه، مش بيقولك تعملها
- Tool (أداة)
- حاجة الـ AI بيستخدمها: بحث، ملف، إيميل
- Workflow
- خطوات ثابتة بتتعاد بنفس الشكل
- Connector
- توصيلة بين Claude وتطبيق بتستخدمه
- Deep Research
- بحث طويل في صفحات كتير بتقرير ومصادر
خد مهمة حقيقية عندك الأسبوع ده (مقارنة، تدوير، خطة)، واكتبها بالقالب، وخلّي Claude يعملها. وبعدها جرّب نفس المهمة بـ Deep Research في Gemini أو ChatGPT وشوف الاختلاف.
المصادر: Anthropic: Building effective agents · Claude: الباقات والمزايا · Claude: Use Research · ChatGPT: Pricing · Gemini: Subscriptions